Форуми IV-уми байналмилалии илмии хонандагон — ғолибони озмунҳои байналмилалӣ, ки дар шаҳри Остонаи Ҷумҳурии Қазоқистон баргузор гардид, барои Ҷумҳурии Тоҷикистон ба як рӯйдоди воқеан таърихиву ифтихорофар табдил ёфт. Ин ҳамоиши бонуфуз на танҳо майдони рақобати зеҳнӣ, балки саҳнаи муаррифии истеъдод, ҷаҳонбинӣ ва фарҳанги илмии насли наврас гардид.
Ҳайати Ҷумҳурии Тоҷикистонро 6 нафар хонандагони лаёқатманди муассисаҳои таълимии шаҳри Душанбе намояндагӣ намуда, бо баромадҳои пурмазмун, таҳқиқоти ҷолиб ва маҳорати баланди муаррифии лоиҳаҳои илмӣ таваҷҷуҳи ҷомеаи байналмилалиро ба худ ҷалб карданд. Онҳо бо далелҳои муътамад, таҳлили амиқ ва суханронии равону боварбахш нишон доданд, ки илми тоҷик дорои заминаи устувор ва ояндаи дурахшон мебошад.
Иштироки фаъол ва натиҷабахши хонандагони тоҷик бори дигар исбот намуд, ки насли ҷавони кишвар дорои иқтидори баланди зеҳнӣ буда, метавонад дар сатҳи ҷаҳонӣ рақобати сазовор анҷом диҳад. Онҳо бо эҳсоси баланди ватандӯстӣ Парчами Тоҷикистонро дар минбари байналмилалӣ баланд бардошта, шарафу нуфузи илму маорифи миллиро боз ҳам таҳким бахшиданд.
Қобили таъкид аст, ки чунин дастовардҳо танҳо маҳсули як чорабинӣ набуда, балки натиҷаи пайвастаи меҳнати шабонарӯзӣ, талошҳои омӯзгорон ва дастгирии муҳити солими таълимӣ мебошанд. Хонандагони тоҷик имрӯзҳо на танҳо дар чунин форумҳо, балки дар озмуну олимпиадаҳои сатҳи байналмилалӣ низ иштироки фаъол дошта, мунтазам бо медалу ҷоизаҳо Ватанро сарбаланд месозанд.
Лаҳзаи бозгашти ин хонандагон ба Ватан ба як тантанаи ҳақиқии ифтихор табдил ёфт. Дар фазои гарму самимӣ, бо эҳсоси баланди шодмонӣ ва қадршиносӣ, онҳо дар сатҳи баланд истиқбол гирифта шуданд. Ин пешвоз рамзи эътирофи заҳмат, эҳтиром ба дониш ва арҷгузорӣ ба неруи зеҳнии насли ҷавон буд. Чеҳраҳои пурифтихор, табассумҳои самимӣ ва суханони дилгармкунанда нишон доданд, ки ҷомеа ба комёбиҳои фарзандони худ чӣ қадр арҷ мегузорад.
Ин ҳама муваффақиятҳо самараи сиёсати хирадмандона ва таваҷҷуҳи пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгириҳои доимии Раиси муҳтарами шаҳри Душанбе муҳтарам Рустами Эмомалӣ дар самти рушди илму маориф ва ҳавасмандгардонии истеъдодҳои ҷавон мебошад. Маҳз чунин сиёсати созанда шароити мусоид фароҳам меорад, то истеъдодҳо рушд ёбанд ва дар арсаи байналмилалӣ шукуфон гарданд.
Форуми мазкур ҳамчун як майдони муҳимми муколамаи илмӣ ба хонандагон имконият дод, ки бо ҳамсолони худ аз кишварҳои гуногун табодули таҷриба намоянд, ҷаҳонбинии илмии худро ғанӣ гардонанд ва робитаҳои нави илмиву фарҳангиро ба роҳ монанд. Ин таҷрибаҳо барои ташаккули шахсияти илмӣ ва рушди минбаъдаи онҳо аҳаммияти бузург доранд.
Бо итминон метавон гуфт, ки ин дастовардҳои арзанда танҳо оғози роҳанд. Дар пеш қуллаҳои боз ҳам баланд, кашфиётҳои нав ва муваффақиятҳои бештар интизоранд. Насли ҷавони тоҷик бо чунин рӯҳия ва неруи зеҳнӣ метавонад дар оянда номи Тоҷикистонро дар арсаи ҷаҳонӣ боз ҳам баландтар муаррифӣ намояд.
Ба ҳамаи хонандагони лаёқатманд комёбиҳои нав, илҳоми тоза ва фатҳи қуллаҳои нави илму донишро орзумандем!
