Бо ташаббуси Вазорати маориф ва илм Ҷумҳурии Тоҷикистон, аз ҷониби Муассисаи давлатии “Маркази ҷумҳуриявии таҳлил, иттилоот ва технологияҳои рақамӣ”, омӯзишҳо ҷиҳати омода намудани тренерони сатҳи миллӣ баргузор гардид.
Ин навбат омӯзиш ба мутахассисони шаҳру ноҳияҳои тобеи ҷумҳурӣ равона шуда, ҳадафи асосии он таъмин намудани татбиқи пурраи Системаи иттилооти идоракунии соҳаи маориф ва илм (EMIS) мебошад. Дар рафти машғулиятҳо иштирокчиён истифодаи имкониятҳои пешрафтаи система, таҳияи ҳисоботҳои мукаммал, идоракунии равандҳои дохилимуассисавӣ ва таҳлили маълумоти омориро аз худ намуданд.
Минбаъд ин мутахассисон ҳамчун тренерони сатҳи миллӣ барои пурра омӯзонидани маъмурони муассисаҳои таълимӣ сафарбар карда мешаванд, то ки ҷараёни татбиқи EMIS дар тамоми сатҳҳо самаранок ба роҳ монда шавад.
Ин иқдом ҳамчун қадами муҳим дар рушди иқтидори кадрӣ ва тақвияти заминаҳои устувори рақамисозии низоми маорифи ҷумҳурӣ арзёбӣ мегардад.
